Xorazm viloyatida quvvati 174 MVt boʻlgan yangi IES foydalanishga topshirildi
Xorazm viloyatida Turkiyaning Odash Enerji kompaniyasi tomonidan qurilgan quvvati 174 MVt boʻlgan yangi issiqlik elektr stansiyasi elektr energiyasi yetkazib berishni boshladi.
Energetika vazirligi matbuot xizmatining xabar berishicha, Turkiyaning Odash Enerji kompaniyasi tomonidan Xorazm viloyati Yangiariq tumanida qurilgan quvvati 174 MVt boʻlgan yangi gaz-porshenli issiqlik elektr stansiyasi 10-mart kuni Oʻzbekistonning yagona elektr tarmogʻiga elektr energiyasi yetkazib berishni boshladi.
IES yiliga 1,4 milliard kVt·soat elektr energiyasi ishlab chiqarishga moʻljallangan. Loyiha qiymati 105 mln dollarni tashkil etdi.
Tabiiy gazni tejash hajmi 175 mln kub metrga baholanmoqda — ushbu hajm hisobiga qoʻshimcha ravishda 800 million kVt·soat elektr energiyasi ishlab chiqarish va har yili 350 ming xonadonni elektr energiyasi bilan taʼminlash mumkin.
Bu yil boshidan buyon foydalanishga topshirilgan uchinchi elektr stansiyasidir. Yanvar oyida Turkiyaning Aksa Enerji energetika kompaniyasi ikkita IESni ishga tushirgan edi: Buxoro viloyatida 270 MVt va Toshkent viloyatida 240 MVt quvvatli stansiyalar.
Avval xabar qilinganidek, yil davomida Oʻzbekiston energetika tizimida jami 7 ta yangi elektr stansiyasi paydo boʻladi.
